Vieiros

Despois de se coñecer que a Real Academia Galega lle dedicará o Día das Letras de 2009 a Ramón Piñeiro, o Concello de Ferrol anunciou que seguirá a recabar apoios para que Ricardo Carvalho Calero reciba o recoñecemento en 2010.

A concelleira ferrolá de Cultura, Yolanda Díaz, manifestou a súa satisfacción persoal pola decisión de lle render homenaxe a Piñeiro, pola súa "importante achega á cultura do país e a súa trasposición ao exterior".

A corporación local de Ferrol apoiou por unanimidade promover a Ricardo Carvalho Calero como autor ao que se lle renda homenaxe no Día das Letras. Díaz lembrou, ademais, que no ano 2010 faise o centenario do nacemento do escritor e lingüista ferrolán, o que "constitúe unha referencia básica para o traballo cara á súa candidatura". Por iso, anunciou que iniciará de inmediato entrevistas cos seus homólogos nas principais cidades e vilas do país para conseguir o seu apoio.

O concello ferrolán xa propuxera o autor para o Día das Letras 2009. Como parte da campaña, concedeu o Premio de Narrativa Carvalho Calero, patrocinado xunto á asociación cultural Medulio, e que recaeu en Henrique Dacosta por Unha nada de doce relatos. A modalidade de investigación e ensaio quedou deserta.