Vieiros

Logo do "anecdótico" cobro irregular de 26 mil euros en dietas por parte do portavoz do PPdeG, Antonio Rodríguez Miranda, o partido de Núñez Feijoo contraatacou volvendo acusar a ex deputada do PSdeG Laura Seara de percibir un "sobresoldo" de 31 mil euros en quilometraxe malia non ter carné de conducir. Todo -os 57 mil euros (perto de 10 millóns de pesetas)- á conta do Parlamento.

Manuel Ruiz Rivas, voceiro parlamentario do PPdeG, cualificou este luns de "suposta estafa" a actuación da actual directora xeral do Instituto da Muller. En troques, considerou que o do seu compañeiro de partido é "un erro recoñecido".

A primeira, dixo en conferencia de prensa, "non puxo ningunha medida" para "solucionar" a súa situación, mentres que o segundo, "cometeu un erro e deu a cara, e está a dar os pasos necesarios para arranxalo". Todos os membros do PPdeG consultados por este xornal remitíronse ás palabras do seu xefe de filas no Hórreo.

PSdeG: "Accións legais contra o PP"
Pola banda do PSOE, tampouco quixo falar a ministra española de Igualdade, Bibiana Aído, cuestionada pola polémica que rodea a súa subordinada. "Non me corresponde a min dar explicacións sobre o funcionamento do Parlamento galego", limitouse a dicir ao remate dunhas xornadas no Congreso.

Foi a portavoz dos socialistas galegos, Mar Barcón, que anunciou unha resposta contundente. Segundo informou, a asesoría xurídica do partido "iniciará accións legais contra o PP por insinuar o cobro ilegal de dietas". O PSdeG "non consentirá que para tapar as vergoñas do señor Rodríguez Miranda, o PP tente nos mesturar todos".

"Aquí non hai un problema do Parlamento, hai un problema de Rodríguez Miranda", aseverou a deputada socialista, que sinalou que o PSdeG "non vai levar a cruz de Miranda, Rueda, Baltar e o Congreso do PP de Ourense", polo que solicitarán formalmente á presidencia do Parlamento "que tome cartas no asunto".

Outro deputado socialista, Xosé Manuel Lage, subscribe as palabras de Barcón e apunta que "aínda que por regra xeral, non creo que os deputados fagan fraude ningún, o certo é que hai un caso, o de Rodríguez Miranda, recoñecido por el mesmo, e non é xusto que se queira estender aos demais. Mesmo é perigoso para a democracia".

Lage recoñece que os comportamentos dos deputados requiren de "responsabilidade individual", e que "os cidadáns teñen dereito á máxima transparencia sobre como se administran os recursos".

BNG: "Luz e taquígrafos"
Consultado ao respecto de toda a polémica, o portavoz parlamentario do BNG, Carlos Aymerich, pensa que "hai que estudar o sistema de retribución e comparar co que se fai noutros parlamentos", mais "non se pode esquecer que aquí quen ten a responsabilidade de actuar é o PP".

"Primeiro -di o nacionalista-, porque o único implicado (Rodríguez Miranda), recoñecido por el mesmo, pertence ás súas filas. E segundo, porque ten a maioría da mesa do Parlamento e correspóndelle propor medidas para evitar as irregularidades".

Ademais, asegura que "pon a man no lume por todas e todos" os seus compañeiros da formación frontista representantes no Hórreo. "No BNG sempre dixemos que a esta planta, que medra en ámbitos escuros, ten que darlle canta máis luz, mellor", destaca.

Por último, ao respecto da acusación sobre a ex deputada socialista Seara, Aymerich recoñece que "pode ter fundamento, dado que non ten carné de conducir", e enmarca o ataque popular na "resposta á denuncia" sobre Rodríguez Miranda, que "se filtra de fontes do PP" e que "demostra o conflito interno" que está a vivir o partido conservador.

Transporte público para os deputados?
Reciben un complemento os deputados que usan o transporte público? O portavoz nacionalista di que contan cunha tarxeta de Renfe e é Renfe quen notifica ao Parlamento o gasto cando se produce.

"Sería o ideal. No entanto -sinala-, o país está como está e non todos os deputados teñen a posibilidade de coller o tren, ou porque non hai rutas ou pola escasa frecuencia de convoios".