Vieiros

Luís Filipe Menezes admitiu que podería estar neste momento a formar goberno de non ter abandonado a presidencia do PSD. Ao termo dun debate sobre a alta velocidade ferroviaria, o alcalde de Vila Nova de Gaia e presidente do Eixo Atlântico confesou que marchou porque lle fixeran "a vida negra".

Porén, evitou posicionarse sobre quen debería ser o sucesor de Manuela Ferreira Leite. "Não estou resentido. A peor cousa que eu podería facer era tomar partido a favor de alguén neste momento", sinalou.

Aínda así analizou criticamente a situación interna da formación: "Penso que o problema do PSD non está na diverxencia entre as persoas. Está no feito de, hai unha quincena de anos para acá, non ter coherencia ideolóxica, estratéxica e programática", salientou

Neste senso, Menezes exemplificou a situación afirmando que "non se pode defender o TGV (tren de alta velocidade, TAV) cando se está no goberno e estar en contra cando se está fóra". Ademais, engadiu que "seria un erro dramático" e "unha especie de albanización do país", se Portugal ficase á marxe da alta velocidade.