Vieiros

A Consellaría de Educación sinalou este mércores que valorarán seriamente a posibilidade de retirarlle as subvencións a colexios que separen a nenos e nenas a partir do vindeiro ano, tal e como xa anunciara en xuño. A consellaría afirma que até o de agora non se tomaron medidas contra estes centros porque a orde dos concertos educativos é de 2005 e está en vigor durante catro anos. Segundo esta argumentación, a Xunta podería exixir a coeducación en todos os colexios concertados a partir do curso 2009/2010.

Porén, dende o ámbito sindical consideran que a consellaría “sae pola tanxente”. Xosé Lois Ribera, da CIG-Ensino, considera que aínda que é verdade que o concerto é por catro anos tamén o é que antes de cada curso se fan revisións do mesmo (a última publicouse o pasado 27 de agosto no DOG). Para Ribera non hai dúbida de que, se hai unha vontade política real, a consellaría pode exixirlle aos colexios que comecen a ter aulas mixtas no primeiro nivel para que se implante progresivamente a coeducacións nos catro centros do Opus Dei que aínda manteñen este sistema nas cidades de Vigo e A Coruña.

• Os sindicatos exixen que a Xunta anule as axudas a colexios que separan nenas e nenos