Vieiros

Google anunciou o lanzamento da súa enciclopedia, Knol. O proxecto levaba uns meses en funcionamento e agora está xa aberto ao público xeral. A súa principal característica, e diferenza fronte á Wikipedia, é que os artigos (ou 'knols') están asinados polos seus autores, que dan a cara pola información que achegan.

Ademais, os autores poden mesmo cobrar pola súa contribución, se deciden incorporar publicidade de Google AdSense nos seus artigos. O xigante estadounidense anima os internautas a participar na iniciativa, e confía en que chegue a haber varios 'knols' sobre o mesmo tema.

Os usuarios poden facer suxestións sobre cambios no contido, que o autor pode aceptar, rexeitar ou modificar antes de que os cambios sexan visíbeis para o público. Deste xeito, os autores, que poñen o seu nome nos artigos, seguen a ter o control sobre os seus contidos, unha filosofía radicalmente distinta da da Wikipedia, baseada na creación colaborativa e anónima.

Para comezar, Google xa anunciou que chegou a un acordo coa revista The New Yorker que permitirá que calquera autor poida engadir aos seus artigos unha banda deseñada do enorme arquivo da publicación.