Vieiros

A Executiva Nacional do BNG resolveu na súa última reunión levantar a suspensión de militancia e, polo tanto, "restituír todos os seus dereitos a todos os efectos", aos edís de Porto do Son, Corcubión e Muros, contra os que tomara esta medida tras incumprir o acordo de gobernabilidade co PSOE.

O BNG lembrou que, no seu día, esas persoas foran suspendidas de militancia e non se lles permitiu inscribirse nos municipios como "grupo municipal do BNG", debido ao incumprimento pola súa parte do acordo entre BNG e PSdeG-PSOE para a gobernabilidade dos concellos galegos, en virtude dunha liña política de pactos estabelecida polo consello Nacional.

Porén, a Executiva do BNG resolveu que, aínda que o incumprimento dos acordos por parte do PSdeG-PSOE no referente á elección da directiva da Fegamp "non muda" a determinación do BNG de cumprir estes acordos, "si cambia a situación e o contexto creado en relación cos militantes do BNG expedientados".

Deste xeito, a dirección nacionalista considerou que o que xulgaba era unha cuestión estatutaria e non unha valoración da actuación política dos concelleiros de Muros, Porto do Son e Corcubión. Consecuentemente, este órgano decidiu resolver os expedientes coa restitución dos seus dereitos como militantes a todos os efectos.

O BNG acusou os alcaldes do PSdeG de incumpriren e vulneraren o pacto asinado entre nacionalistas e socialistas para impulsar unha presidencia rotatoria na Federación Galega de Municipios e Provincias (Fegamp) na asemblea que este órgano tivo o 22 de novembro.

Reaccións do PSdeG
A dirección do PSdeG-PSOE criticou a decisión do BNG. O secretario de organización dos socialistas, Ricardo Varela, dixo que "con esta decisión non só evita a expulsión dos citados concelleiros senón que lle dá o visto e prace aos gobernos de coalición co PP en Muros e Corcubión e ao pacto de gobernabilidade de Porto do Son".

Varela negou que existise un acordo na Fegamp e tacha a resolución dos nacionalistas de "coartada para non expulsar os concelleiros" que, segundo afirma, vulneraron "o acordo nacional asinado entre o PSdeG e o BNG", e asegura que "a decisión do BNG reflexa a determinación dos nacionalistas de facer gobernos de coalición co PP".