Vieiros

A tribo billardeira anda revolta esta fin de semana. Todo está preparado para que os palanadores do país demostren a súa habilidade nun abril de frenética actividade billardeira que dende o venres se trasladará até Marín e o domingo a Lugo. Será coa disputa do Aberto de Marín, da Confederación Sur, e do Aberto do Levantamento 1846, título que este ano leva o Aberto de Billarda Cidade de Lugo, que reunirá aos palanadores do NorLeste.

Non hai erro posíbel, a Liga Nacional de Billarda (LNB) xa adianta na súa web as indicacións ao detalle, para que ningún desorientado competidor erre o camiño e se traslade a un concello diferente aos de Marín ou Lugo. Tal lle aconteceu a a Manu da Faísca, un dos co que con máis entusiasmo se agarda, logo do seu espectacular periplo narrado no corto "Salceda-Marín" que xa se pode ver en Tele-Varal (ver vídeo). Manu, confundido sen dúbida pola súa ansia de demostrar a súa destreza con palán e billarda, presentouse a xogar en Salvaterra cando o aberto da LNB se celebraba en Salceda, erro que, ben é sabido, ninguén está libre de cometer.

Para que ninguén teña que sufrir igual confusión, velaquí as saídas e as chegadas para toda a tribo LNB:
 

• Aberto de Marín- Sábado 10 de abril, no colexio O Sequelo (non é o mesmo do ano pasado) a partir das 4 da tarde. Outras actividades: Venres 9 ás 20H palestra sobre a billarda no centro social Almuinha (rúa Ezequiel Massoni nº 63). Sábado 10 ás 14H xantar no centro social Almuinha (en principio será unha fabada) e o prezo 10€

• Aberto Cidade de Lugo-Aberto do Levantamento 1846.- Domingo 11 de abril, no Barrio da Ponte (pista da asociación de veciños de San Lázaro) a partir das 4 da tarde.Expedición que parte da mariña: a serpe de carros partirá ás 14 h dende o Restaurante O Asador de Barreiros.

• Xerro do Salnés : 25 de abril [Xil-Meaño] A LNB prepara a viaxe nunha guagua que partirá dende Ribadeo cara Xil onde se realizará a tradicional xeira de Furanchos + xantar de irmandade + Aberto do Xerro. Hai posibilidade que ademáis de transportar ós palanadores do Norleste a Guagua faiga parada no Restaurante O Cruceiro do Pino para subir tripulación da Confederación Centro máis outra parada na estación de Buses de Compostela para subir os palanador@s que así o soliciten.