Vieiros

O servizo de Normalización Lingüística do Concello de Carballo, en colaboración con 10 medios de comunicación escrita, entre eles Vieiros, convoca a quinta edición do seu Premio a artigos xornalísticos normalizadores. Os obxectivos do certame son reflexionar sobre a situación social da lingua, crear espazos nos xornais para analizar e promocionar o uso do galego e promover o seu uso na prensa escrita.

Pódense presentar artigos xornalísticos de opinión inéditos que traten algún tema relacionado co idioma, como a súa defensa e promoción, o status, experiencias dinamizadoras ou política lingüística. A súa extensión será de entre 2.500 e 3.500 caracteres, e o prazo de admisión, que acaba de abrirse, remata o 8 de maio. Haberá un único gañador que recibirá 1.200 euros.

As bases íntegras poderanse consultar na web do concello carballés, escribindo un correo a normalizador@carballo.org ou chamando ao teléfono 981 704 304. Nas anteriores edicións recibiron o premio autores como Xurxo Fernández Carballido, Olga Patiño Abeixón, Ana Rodríguez Barreiro, Ramón Vilar Landeira, Miguel Mosquera Fociños, Séchu Sende, Kiko Novoa e Xesús Fraga.