Vieiros

O III Premio a Artigos Xornalísticos Normalizadores Concello de Carballo xa ten gañador. Miguel Mosquera Fociños, un estudante de terceiro ciclo da USC, impúxose no certame cun traballo titulado “Obreiras, tolos, escolares, poetas. A lingua galega nas cidades”. O artigo "Guía da sociolingüística sexual", do escritor e profesor Sechu Sende, obtivo o segundo galardón. Finalmente, o xurado propuxo un accésit para o traballo "Rariño seralo ti", de Xabier Cid, profesor de galego na Universidade de Stirling (Escocia).

O xurado destacou a “notábel calidade” dos 33 artigos presentados este ano ao certame. Os gañadores dos dous primeiros premios, dotados con 1.000 e 350 euros recollerán os seus galardóns o vindeiro xoves 17 de maio nun acto que organiza o Concello de Carballo. Os artigos vencedores publicaranse en diferentes medios do país, entre eles Vieiros.