Vieiros

"Esta é a noite máis feliz da miña vida e quero que sexa tamén a noite da máis grande esperanza en El Salvador", declaraba Mauricio Funes, presidente electo, no seu discurso despois de confirmarse o triunfo do FMLN. Na súa primeira intervención logo de coñecerse a vitoria, o candidato do FMLN, que era ademais o primeiro do partido sen pasado nas filas guerrilleiras, chamou a aproveitar esta viraxe política para camiñar cara a un "novo acordo de paz e reconciliación" no país. Un ton importante ao cabo dunha campaña de moita tensión, onde os conservadores botaran man de todos os resortes de poder e maquinaria mediática para erosionar a ampla vantaxe que hai semanas aínda lle concedían as enquisas ao FMLN. Advertencias sobre a presunta "venda do país" ao "comunismo" e "a Hugo Chávez" eran arengas que podían lerse na prensa salvadoreña estes días.

O último informe do Tribunal Electoral outorgoulle ao candidato da esquerda o 51,27% dos apoios (1.231.755 votos), mentres que o candidato da dereita, Rodrigo Ávila, baixo as siglas da Alianza Republicana Nacionalista (ARENA), obtiña o 48,73% (1.170.780 sufraxios). Os comicios celebráronse cunha participación récord, por riba do 60% dos electores foron votar, e baixo a mirada duns 5 milleiros de observadores, moitos deles internacionais.

Un triunfo histórico apenas quince anos despois de que o FMLN, antigo grupo guerrilleiro, fose legalizado como partido político despois de algo máis dunha década de enfrontamentos co exército salvadoreño (1980-1992) e milleiros de mortos. A esquerda derrota así nas presidenciais á hexemónica ARENA, formación dereitista atrás da que se mantén a sombra dos chamados "escuadróns da morte" salvadoreños e que acudía a esta cita cun candidato de pasado vencellado aos paramilitares.