Vieiros

O Salvador vive este domingo unha xornada electoral histórica e competida. A rifa final estará entre os candidatos do oficialismo de dereita e a ex guerrilla esquerdista. Segundo as enquisas, os candidatos, Rodrigo Avila, da forza gobernante Alianza Republicana Nacionalista (Arena) e Mauricio Funes, do Frente Farabundo Martí para a Liberación Nacional (FMLN), están empatados técnicamente. Así, a chave do resultado desta xornada estará na man do 20% de indecisos que aínda non decidiron o seu voto.

Esta é a primeira vez que Arena pode perder a súa hexemonía, xa que se mantén no poder dende xuño de 1989. Ávila, o candidato por esta opción de dereitas, asegurou que "aceptará" e "será respectuoso" coa decisión dos electores nestes comicios, nos que están chamados a participar uns 4,3 millóns de salvadoreños. A tensión é moita nas rúas, e mesmo no sábado houbo disturbios en pleno centro da capital, San Salvador. Mentres, o actual presidente, Elías Antonio Saca, nunha mensaxe ao país pediu aos cidadáns que acudan a votar para "defender o futuro da patria" nunhas eleccións que deben, dixo, "converterse nunha festa cívica".