Vieiros

Hostaleiros e adegueiros de todo o país, xunto con amigos e "amantes" da cociña, apoiaron este venres cunha comida no restaurante de Toñi Vicente o "prestixio" da chef, imputada por un delito contra a saúde pública pola suposta compra de vieiras contaminadas.

Unhas 60 persoas, entre as que salientaba o político Xosé Manuel Beiras, reuníronse no restaurante que a cociñeira ten en Compostela. Toñi Vicente recibiu o aplauso dos comensais e asegurou sentirse "moi afortunada" por "ter estes grandes amigos", entre os que tamén estaban representantes do colectivo de hostaleiros galegos en Madrid e Barcelona.

Xosé Manuel Beiras, que se declarou "admirador" da "traxectoria exemplar" da cociñeira, opinou que non se pode converter unha persoa en "chibo expiatorio" con "unha agresión que pode acabar con decenios de anos de traballo". "De traballo contra vento e marea", engadiu.

"Mundo ao revés"
Ademais, cualificou de "escándalo" que o proceso xudicial se empece "ao revés" en lugar de centrar o problema nos responsábeis da suposta contaminación do marisco.

Beiras apuntou neste senso "a industria", que contaminou as rías e acabou co marisqueo, e referiuse á "destrución da costa" con medidas como "o plan de piscifactorías". E concluíu a súa intervención citando ao escritor uruguaio Eduardo Galeano, cuestionándose se estamos "nun mundo absolutamente patas para arriba".