Vieiros

A Secretaría Xeral de Política Lingüística vai asinar esta semana un convenio de colaboración con cinco operadores de telefonía móbil e con outros cinco fabricantes de teléfonos para incorporar a lingua galega tanto aos menús dos aparatos como aos servizos de atención ao cliente, webs e campañas publicitarias, entre outros aspectos.

A pretensión do departamento autonómico é incorporar e normalizar o uso da lingua a un eido de importante demanda como é a telefonía móbil. As empresas que colaborarán na campaña serán os operadores R, Telefónica, Vodafone, Orange e Yoigo e os fabricantes Motorola, Nokia, Samsung, Sony-Ericsson e Alcatel.

O convenio contempla a implantación progresiva da nosa lingua tanto nos menús e aplicacións como nos servizos que ofertan os operadores. Política Lingüística facilitará apoio técnico para a tradución e asesoramento lingüístico na revisión terminolóxica das mensaxes.

Reaccións
A Mesa pola Normalización Lingüística aplaudiu a iniciativa, aínda que lamentou que non se fixese até agora, despois de que tanto a Generalitat catalá como o Goberno vasco asinasen convenios semellantes.