Vieiros

O acordo político e comercial que tiñan previsto asinar Serbia e a Unión Europea terase que adiar pola oposición do primeiro ministro, Vojislav Koštunica. O comisario europeo de Ampliación, Olli Rehn, amosou a súa decepción pola reacción do político serbio, debida á tutela que exerce a UE sobre a independencia de Cosova.

Porén, Rehn quixo deixar claro que a oferta "segue sobre a mesa", e amosouse disposto a continuar o díalogo nalgúns puntos. Os Vintesete ofrecéranlle a Serbia antes das eleccións un acordo-marco interino para o diálogo político, o libre comercio, a liberalización dos visados, a cooperación económica e o intercambio de estudantes. O texto redactouse neses termos pola negativa dos Países Baixos de permitir un acordo de estabilización e asociación até que Serbia colabore co Tribunal Penal Internacional para a antiga Iugoslavia.

Olli Rehn afrmou que espera que se cumpran as condicións coa viaxe do fiscal xefe do Tribunal a Belgrado antes do 18 de febreiro, data do Consello de Ministros de Asuntos Exteriores da UE. O executivo europeo non está a ter éxito no seu intento de compatibilizar unhas boas relacións con Serbia e apoiar a secesión de parte do seu territorio. Aínda así, Rehn afirmou que a vitoria de Tadić nos últimos comicios presidenciais significa que os serbios queren "un futuro europeo e unha vida mellor".