Vieiros

Os orzamentos municipais lucenses para 2008 serán aprobados en pleno extraordinario dentro de dúas semanas, logo do acordo entre o PSOE de e PP.

O alcalde de Lugo, Xosé Clemente López Orozco, e a concelleira de Economía, Sonia Méndez, mantiveron unha xuntanza este venres onde chegaron a un acordo co Grupo Popular. López Orozco salientou a súa "ledicia" polo seu apoio.

"Cando hai consenso, desa suma sae beneficiada a cidade", dixo, e afirmou que o pacto non modifica o esquema de goberno, senón que "se suma outra visión e iso supón que máis lucenses se ven reflectidos nestes orzamentos".

O alcalde lembrou que nas eleccións municipais do 27 de maio "a cidadanía decidiu que fose necesario o acordo para sacar adiante algúns temas", e que polo tanto "son máis de 40.000 lucenses os que din que si a estes orzamentos".

Pola súa banda, o líder do BNG lucense, Xosé Anxo Laxe, afirmou que PP e PSOE fixeron un "troco de cromos", e que os populares apoiarán o presupostos cunha simple modificación de 360.000 euros na proposta inicial presentada por Xosé Clemente López Orozco.

"Goberno de centro-dereita"
Este é o terceiro pacto entre Orozco e o PP no que vai de mandato, despois do Pleno de Organización e da privatización do servizo de augas. O voceiro nacionalista afirmou que "o goberno de centro-dereita lucense entre o PP e o PSOE é verdadeiramente sólido, goza de boa saúde e está máis vivo que nunca".

Segundo Laxe, o BNG propoñía uns "orzamentos sociais e investidores", con redución dos gastos superfluos, "mais o PSOE preferiu ao Partido Popular antes ca o Bloque Nacionalista Galego".