Vieiros

O ex presidente do Goberno e senador popular Manuel Fraga Iribarne amosouse esperanzado en que "o pobo español recapacite sobre onde están os seus intereses" de cara ás eleccións xerais, despois de que a ETA anunciase na madrugada desta terza a ruptura da tregua.

Así se pronunciou Fraga en declaracións aos xornalistas minutos antes de acudir a un almorzo co embaixador de EUA no Estado, Eduardo Aguirre, organizado pola axencia de noticias Europa Press.

Cambio de actitude nos fiscais
Ao seu xuízo, o comunicado da organización terrorista é testemuña de que o Executivo español estivo "equivocado dende o primeiro momento", como así quedou demostrado, segundo salientou, co atentado da T4.

Neste senso, o ex presidente subliñou a necesidade de que o goberno español "troque as instrucións" aos fiscais, e tome as medidas oportunas para loitar contra a ETA. Nese camiño, engadiu, contará co apoio do PP.