Vieiros

Na compaña dos seus ministros de Exteriores, Reinaldo Gargano, e economía, Danilo Astori, o dirixente charrúa ten que desfacerse dos ecoloxistas que loitan contra a construción dunha papeleira da compañía finlandesa Botnia en Fray Bentos.

Trátase do obxectivo dun videoxogo creado pola web humorística DiosNosLibre.com. Nel, parodiase a crise internacional entre Uruguai e Arxentina por mor das papeleiras. Ecoloxistas arxentinos adoitan bloquear as diversas pontes sobre o río Uruguai que unen ambos países co fin de boicotear a construción das factorías.

O xogo, co nome de ‘Counter Piquete’ ten tres fases diferentes. Na primeira, os políticos loitan por acadar unha boa puntuación ao enfrontarse aos ecoloxistas na ponte entre as localidades de Fray Bentos e Guelaguaychú. Na segunda fase o que importa é o número de activistas asasinados no paso entre Paysandú e Colón. Na terceira fase, (Salto-Concordia) o xogador ten que acabar cos ‘piquetes’ tendo en conta o tempo empregado.

Desde a web DiosNosLibre.com insístese en que “o xogo apunta a satirizar a situación actual entre os pobo irmáns e debe ser tomado como a parodia que é” e sinalan que agardan que as personaxes “se tomen o xogo co humor que lle corresponde”.

• Videoxogo online 'Counter Piquete'
• Wikipedia: Conflito entre Argentina e Uruguai polas plantas de celulosa