Vieiros

Os actos están enmarcados dentro da campaña de Acollida lingüística e terán lugar durante a diada de Sant Jordi, o día 23 de abril, na Plaça de Catalunya de Barcelona. O evento concrétase nunha grande acción destinada a destacar o papel do catalán como elemento de inclusión das persoas chegadas recentemente a Catalunya e pretende mostrar as diferentes caras dunha sociedade, a catalá, que tende cara á formas interculturais e que toma lingua catalá como un dos eixes vertebradores da diversidade.

Porén, Espazo Galego dos Països Catalans, que forma parte das entidades que colaboran na Campaña, manterá novamente este ano a decisión de non facer visible a súa participación no acto ao estar en desacordo co excesivo protagonismo adquirido por algunhas das administracións públicas patrocinadoras. Este posicionamento nace, principalmente, da insistencia dos representantes destas administracións en intervir publicamente na xornada, co único obxectivo de obter réditos de carácter político, feito que provoca, ademais, que as entidades organizadoras queden nun segundo plano.

Espazo Galego tamén manifesta a intención de continuar traballando, xunto ao resto de asociacións, na campaña de acollida lingüística promovida pola Plataforma per la Llengua.