Vieiros

"Non se poden antepoñer os intereses das multinacionais sobre a saúde humana". Advertíao Tereixa Paz, deputada do BNG, durante a súa intervención este mércores na Comisión de Agricultura do Parlamento. A voceira do Bloque insistiu en que a súa formación non se opón aos avances da biotecnoloxía mais si "en contra de que se antepoñan os intereses das grandes multinacionais que promoven os cultivos transxénicos sobre o principio de precaución, que aconsella antepoñer a protección da saúde humana e do medioambiente cando, caso dos cultivos transxénicos, aínda non se coñecen os seus efectos negativo".

A proposición de lei do BNG instaba a Xunta a declarar Galiza como "zona libre de cultivos transxénicos na produción de produtos tanto destinados á alimentación humana como á animal". De paso, convidaban a que o noso país participase nas accións da Rede de Rexións Europeas que se declaran libres de cultivos transxénicos e a impulsar todas aquelas medidas orientadas ao estabelecemento de mecanismos para "impedir a produción en Galiza de cultivos modificados xeneticamente destinados á alimentación". A maiores, solicitábase que o Goberno deseñase normas que outorgasen a máxima protección aos cultivos convencionais e ecolóxicos. Tereixa Paz cualificou de "falacia" os argumentos a prol dos transxénicos que os defenden como xeito de incrementar as colleitas "e axudar a erradicar a fame no mundo". "Só traen máis empobrecemento", censurou. A iniciativa foi tombada polo voto conxunto de PP e PSOE.