Vieiros

Segundo informou o Fryske Nasjonale Partij (FNP) a través da ALE, o vindeiro 21 de abril presentarán no Provinsjale Steaten (parlamento provincial) varias iniciativas dirixidas a aumentar as competencias de Frisia, constituída actualmente como provincia de Holanda.

Nesta mesma Cámara propuxeron a organización dun referendo nesta rexión occidental da Fryslân histórica destinado a decidir se a poboación acepta que esta se dilúa nun ente superior dentro dunha hipotética nova subdivisión de Holanda.

Esta posibilidade foi apuntada por algúns partidos de ámbito estatal como o D66 ou o PvdA no sentido de reducir o número de provincias para crear entidades administrativas máis grandes.

"Debilitar o estatus das nacións sen estado"
Frisia ficaría absorbida por unha rexión do tipo "Parte norte do país", din, e perdería a súa xa pequena autonomía e identidade institucional. A provincia, recordan desde o partido nacionalista, ten unha identidade diferenciada e única en Holanda, con cultura e lingua de seu.

"A situación lembra o acontecido moitas veces noutros lugares de Europa, onde a administración central tentou debilitar a posición das nacións sen estado tirándolles o seu grao de autogoberno", apuntan, e que "reflicte o déficit democrático na UE contra que loita a ALE".

• Máis información sobre Fryslân no especial Europa, Terra de Pobos