Vieiros

O BNG interesouse polos criterios que empregou a Xunta á hora de promocionar as novas rutas internacionais adxudicadas á compañía Vueling. Segundo constatou a parlamentaria Carme Adán, non se convocou ningún concurso público para a adxudicación, da que se beneficiou a empresa presidida polo ex-presidente do PP catalán Josep Piqué.

A deputada ve unha "contradición" entre o feito de que o Goberno invista "4,5 millóns de euros na promoción de liñas de baixo custo" cando amosou "desinterese polo número de visitantes a Galiza". Tamén pediu "que a Xunta explique os criterios que se seguiron" para a adxudicación das liñas a Zúric, Bruxelas e Amsterdam, e cales son "as expectativas de incremento de viaxeiros e as liñas a seguir para incentivar a afluencia de visitantes ao Xacobeo 2010”.

Carme Adán reiterou as súas críticas ao xeito de divulgar e promocionar o Xacobeo e considerou que o acontecido con Vueling é unha mostra máis da "improvisación do Goberno".

Non é a primeira vez que a oposición pide explicacións sobre o contrato. Xa a adxudicación das novas rutas só á compañía de Piqué foi motivo dunha iniciativa presentada polo PSdeG en novembro. Daquela, María Quintas amosou a súa estrañeza polo feito de que "entre 72 opcións de aeroliñas" a Xunta escollese a dun ex-ministro do PP.