Vieiros

A "despolitización" das caixas derivada da introdución de representación parlamentaria nos órganos de dirección e da esixencia de que ningún dos representantes poida ter cargo político ou de persoal de confianza, foi este martes un dos argumentos expostos pola conselleira de Facenda, Marta Fernández Currás, para felicitar a reforma legal aprobada polo Parlamento. Fernández Currás subliñou ao fío o avance na "profesionalización" e a introdución do requirimento dun mínimo de formación financeira para os membros das asembleas xerais e consellos de administración.

Por outro lado, Currás quitoulle importancia ás acusacións do grupo parlamentario do PSdeG ao respecto do presunto intervencionismo da nova lei e da suposta presión para o relevo nas cúpulas en favor da orientación cara a unha fusión entre Caixa Galicia e Caixanova. A conselleira definiu de "non certas" e "esaxeradas" as acusacións arreboladas polos socialistas. De xeito específico, referiuse ás críticas ao respecto do control da obra social, indicando que "o único que se fai é garantir a seguridade xurídica dos gastos feitos e de que estes sexan coherentes cos intereses sociais prioritarios". "Dáselle liberdade de decisión ás caixas, malia que sempre dentro duns sectores prioritarios", precisou. Fernández Currás foi tamén moi crítica coa reclamación do PSOE para estender todo o proceso un ano, advertindo de que na actual conxuntura "non parece lóxico manter aberta esa incerteza".