Vieiros

O Partido Popular de Galiza fixo público un comunicado co gallo dos 31 anos da aprobación da Constitución española. No texto, os conservadores aseguran que o actual presidente da Xunta, Alberto Núñez Feijoo, é unha peza fundamental para manter vivo o espírito da carta política española. Así, lembran que hai tres anos o posicionamento do PPdeG botou por terra un intento de reforma do Estatuto de Autonomía que tildaron de “delirio”.

Os “populares” sinalan que mentres teñan capacidade política nunca permitirán que Galiza aprobe un Estatuto de Nación, a semellanza do catalán. De feito, non desaproveitan a ocasión para cargar contra o BNG por ter liderado a pasada lexislatura a campaña en prol dun novo Estatuto mais tamén lembran que “o presidente do PSdeG da Coruña, Francisco Caamaño, foi o actor intelectual dun texto recorrido a día de hoxe (Estatuto de Cataluña) e que está á espera da súa sentenza”.