Vieiros

Consideran desde o PP que é "un feito claro" que Galiza "non quere bipartitos que destinen o seu tempo a amañar as súas disputas internas no canto de gobernar". "Por iso, despois de dous anos de coalición PSOE-BNG asinada en Santiago, pero aplicada nos concellos, os pactos están rachando", afirman desde o PP.

Nun comunicado enviado aos medios na tarde deste martes e logo de coñecerse que o BNG deixaba a coalición co PSOE no Concello de Fene, teiman desde o PP en que a unión destas dúas forzas "xa resultou un fracaso a nivel autonómico coa súa ampla derrota o pasado 1 de marzo". Citan os populares, ademais do caso fenés, os de Vilariño de Conso e Gondomar, e apuntan ao fío que se trata dunha "proba máis" de que "a coalición entre ambas forzas políticas non só non é frutífera senón que é nociva para os intereses dos veciños". "A ineficacia, a desunión e a falta de cohesión entre o PSOE e o BNG pon de manifesto que a súa alianza é antinatural e realizada co único fin de apartar do poder o PPdeG", censuran.