Vieiros

A representación que a nivel do Estado Español se elixía esta fin de semana na cita coas urnas era de 50 escanos no Parlamento Europeo. Así e todo, no marco do Tratado de Lisboa, actualmente en proceso de ratificación, o Estado verá ampliada esa representación até os 54 escanos. Catro asentos extra que se repartirán en función dos resultados da cita electoral deste domingo.

Xa que logo, e atendendo a esas cifras, a proxección dos datos a ese escenario outórgalle cando menos dous asentos máis ao Partido Popular, que ascendería de 23 até 25 eurodeputados. Do mesmo xeito, o PSOE rabuñaría cando menos un escano máis, enviando ao Parlamento Europeo outro eurodeputado, o seu número 22. O cuarto escano en disputa caería en principio do lado da Coalición por Europa, gañándoo CiU. Así e todo, dependería do escrutinio do voto emigrante, xa que un elevado apoio para os socialistas (a miúdo a forza gobernante a nivel estatal é favorecida maioritariamente polo voto exterior), levaría ese cuarto escano en liza ao PSOE.