Vieiros

O domingo pola mañá ergueuse o toque de queda no Val do Swat, momento que aproveitaron milleiros de civís para fuxir da zona e dos combates entre o exército de Paquistán e os talibáns.

Os militares paquistanís aseguraron ter matado a perto de 200 talibáns neste distrito, e no de Shangla, que está a carón. Porén, a incapacidade do goberno para facerlle fronte ao crecente número de persoas desprazadas corre o risco de minar o apoio popular que tiña esta operación militar no Swat.

Tras o levantamento do toque de queda, decenas de milleiros de residentes na contorna do Val do Swat, ocupado polos talibáns, recolleron as súas pertenencias e botaron a andar, fuxindo con rapidez, ante a posibilidade de que este anuncio significase unha intensificación dos combates. "A miña información é que máis de 100 mil persoas conseguiron abandonar Swat durante o día de hoxe", declarou o domingo o ministro de Montes de Paquistán, Wajid Ali, que é tamén deputado por Mingora, a principal cidade deste distrito. Con estas 100 mil persoas, xa son 300 mil as desprazadas dende que o exército paquistaní lanzou a ofensiva militar para frear o avance dos talibáns hai dúas semanas.

Axudas para os desprazados
A ONU e o goberno de Islamabad pedíronlle á comunidade internacional que faga aportacións extraordinarias para facerlle fronte a este importante éxodo de civís. O sábado, o primeiro ministro, Yousuf Raza Gilani, suxeriulles aos membros do goberno federal que donasen os seus soldos dun mes ao fondo de axuda aos desprazados pola operación militar no Swat. Porén, só os membros do goberno e do Parlamento da Provincia da Fronteira Noroccidenal (NWFT, nas súas siglas en inglés) anunciaron que van facer este aceno de solidariedade.

De todos os xeitos, nun país que acaba de pedir en empréstito de 5,6 millóns de euros do FMI para evitar a bancarrota, estas axudas son pequenas.


Máis información:

• The Guardian: Pakistani civilians flee Swat valley as major ground offensive draws closer
• BBC: Pakistan steps up Swat offensive
• Daily Times (Paquistán): 200 Taliban killed in Swat operation
• The Nation (Paquistán): Fierce clashes as troops advance
• Dawn (Paquistán): At least 360,000 flee fighting in Swat, Buner, Lower Dir