Vieiros

Esta semana continúan as mobilización contra a entrada das Universidades no Espazo Europeo de Educación Superior (EEES), o coñecido coma Proceso Boloña.

No noso país hai convocadas concentracións -en Compostela (esta terza feira, ao mediodía, diante da Reitoría); en Vigo (ás 20h00, diante do Marco); e na Coruña (tamén ao mediodía, e diante da Reitoría)-, en solidariedade cos estudantes cataláns que foron reprimidos violentamente polos Mossos d'Esquadra a pasada semana, cando se manifestaban polo desaloxo do edificio histórico Universidade de Barcelona, que fora ocupado en protesta contra Boloña.

Alén disto, os e as estudantes galegos volverán reclamar, na rúa, unha Universidade pública galega e a paralización completa deste proceso, "que procura a privatización e precarización" do saber, "que se subordina aos intereses das empresas, á elitización da educación e á desaparición da autonomía universitaria".

Un mes sen comer, protestando contra Boloña
O estudante da Universidade Autónoma de Barcelona (UAB) e militante do SEPC (Sindicat d'Estudiants dels Països Catalans), Tomàs Sayés, leva sen comer ren dende o pasado 23 de febreiro, día no que decidiu comezar unha folga de fame en protesta contra a aplicación do Proceso de Boloña na Universidade catalá.

Esta terza feira estaba previsto o seu ingreso no Hospital de Terrassa, tras ser recomendado polos médicos que o atenden. Porén, Sayés volveu reiterar, segundo publica o diario dixital catalán Vilaweb, que a folga de fame é "indefinida". "Ante a situación que se viviu a semana pasada co desaloxo do reitorado da UB e as agresións policiais, así como ante o silencio co que as institucións trataron esta folga de fame, e a negativa de escoitar as cuestións das que estamos a falar, decidimos ir máis alá". Agora, este estudante decidiu que tampouco vai inxerir azucre, xa que, segundo sinalou, "continúo convencido do que estou a facer, e estou disposto a continuar, aínda cando fisicamente me atopo cada vez máis canso". Neste tempo, Sayés perdeu 10 quilos, case o 20% do seu peso corporal. Día a día, os seus compañeiros e el propio, foron anotando a súa evolución nun seu blog Vaga de fam per la Universitat Pública (Folga de fame pola Universidade pública).

Portugal tamén sae á rúa contra Boloña
Aínda que unha das reivindicacións dos estudantes portugués é a paralización do Proceso de Boloña nas súas Universidades, tamén é certo que esta terza feira saen á rúa por "un pouco de todo".

Alumnado do Ensino Básico, Secundario e Superior percorre as rúas das principais cidades lusas, no Dia do Estudante, en protesta polos principais problemas que os afectan: dende o Proceso de Boloña e as propinas -as taxas-, no caso dos estudantes universitarios, até a reivindicación da fin dos exames nacionais e do Estatuto do Alumno, no caso dos estudantes de Secundaria.

Máis información das loitas contra Boloña:

• (16/03/2009) Presentación da Plataforma en Defensa da Universidade Pública Galega: "Estase privatizando o coñecemento, no beneficio das grandes empresas"

• (05/03/2009) Reportaxe con vídeo: Outra volta, nas rúas contra a "mercantilización do ensino"

• (23/12/2008) Adaptación a Boloña nas tres universidades do país: Máis de 60 titulacións comezan a adaptarse ao Proceso de Boloña

• (24/05/2007) Entrevista ao catedrático de Historia Antiga da USC, Xosé Carlos Bermejo: "O proceso de Boloña significa o paso da universidade pública á mercantil"