Vieiros

O xuíz da Audiencia Nacional Baltasar Garzón ditou esta cuarta feira unha providencia na que dá 48 horas á Fiscalía Anticorrupción para que o informe se debe inhibirse en favor do Tribunal Supremo.

O maxistrado asegura que a Policía presentou un novo informe este martes ás 15.30 horas onde se indica que na causa que investiga a suposta trama de corrupción relacionada coa 'Operación Gürtel' estarían implicados novos aforados.

En concreto habería indicios de responsabilidade penal contra un senador e un eurodeputado do Partido Popular, que segundo publica a prensa española, serían Luis Bárcenas, tesoureiro do PP, no primeiro caso, e Gerardo Galeote, eurodeputado popular, no segundo.

Conexión da suposta trama co PPdeG
A resolución do xuíz Garzón fíxose pública apenas unha hora despois de que o PP presentase ante o Alto Tribunal unha querela en contra do xuíz por prevaricación. Dende que se iniciou a operación foron saíndo á luz conexións dos 'populares' de todo o Estado coa suposta trama.

Tamén en Galiza, a relación entre o candidato número un pola Coruña, Carlos Negreira, e un dos detidos, o ex secretario de Organización do PPdeG, Pablo Crespo, está a resultar un lastre para os de Feijoo na campaña electoral.