Vieiros

O conflito do gas entre Rusia e Ucraína alcanzou o sueste de Europa. A suspensión dos envíos de gas da compañía estatal rusa Gazprom a través dos condutos que atravesan Ucraína provocou que a subministración a Grecia se reduza nun terzo. En Romanía a redución foi de até o 30%, e en Bulgaria do 15%.

Tamén as antigas repúblicas de Iugoslavia están a sufrir problemas. Croacia, que importa o 40% do gas que necesita, viu diminuír a súa subministración un 7%, mentres que Serbia recoñeceu rexistrar problemas de abastecemento.

O vicepresidente de Gazprom, Alexandr Medvédev, acusou a Ucraína de roubar 50 millóns de metros cúbicos de gas dos gasodutos que atravesan o país. Así, aos 25 millóns de metros cúbicos de Gazprom súmanse outros 25 millóns propiedade da firma ruso-ucraína RosUkrEnergo que debían chegar a Polonia, Hungría e Romanía.