Vieiros

En parecidos termos aos usados polo líder do PpdeG, Manuel Ruíz Rivas, voceiro parlamentario do PPdeG, dixo ver "obsesión polo pasado" no bipartito e acusou de "ocultación da realidade" a socialistas e nacionalistas. Na opinión de Ruíz Rivas, as 584 propostas de resolución presentadas polo PP, fronte ás 31 pactadas por PsdeG e BNG son exemplo "do traballo duns e doutros".

Rivas volveu solicitar que o Goberno se aveña a negociar os orzamentos da Xunta para 2009 coa oposición, indicando que este "é o instrumento máis potente para facer fronte á actual situación de desaceleración". Ao respecto do "plan de austeridade" que dixo ver necesario, Rivas referiuse, ao igual que o fixera Feijoo o día anterior, á supresión de consellarías, unidades administrativas e número de asesores.

"As marabillas que dixo onte malamente podería repetilas en calquera mercado de abastos de Galiza", comentou o voceiro popular en dirección ao presidente da Xunta. Ruíz Rivas insistiu en criticar que o Goberno "non ten contacto coa xente".