Vieiros

A insolvencia está a incrementarse no mundo empresarial e as estatísticas comezan xa a reflectilo. O número de procedementos concursais está a medrar e Galiza non é allea a este contexto de crise. Así o vén de demostrar un estudo elaborado pola aseguradora Crédito e Caución que revela que no terceiro trimestre do ano se multiplicou por tres o número de empresas que se viron obrigadas a acudir á suspensión de pagamentos. Até setembro, podemos contabilizar 120 compañías que se atopan nesta situación, o triple das 41 que se contabilizaban no mesmo período do exercicio anterior.

Segundo os datos extraidos do Boletín Oficial do Estado (BOE), as insolvencias xudiciais incrementáronse un 192,7% nos nove primeiros meses do ano, o que mesmo supera as cifras do Estado español, no que o aumento se situou no 138,8%. Ademais, segundo a compañía de seguros que elabora o estudo, ao longo do cuarto trimestre mesmo se intensificará o incremento da concursalidade por mor das "dificultades de liquidez asociadas á crise crediticia que se poderían prolongar até 2010 e a profunda reestruturación sectorial da construción e dos seus sectores anexos".

A provincia de Pontevedra é a máis afectada polo inicio de procesos de suspensión de pagamentos, con 73 procesos abertos fronte aos 10 de 2007; Pola contra, Lugo é na que menos concursos de acredores está a rexistrar, con cinco casos (rexistrara oito en 2007). Se analizamos os sectores, o da construción é o que leva a peor parte: no Estado español o 24,9% das insolvencias xudiciais concéntranse neste eido. Doutra banda, as expectativas para o futuro non son moi positivas: na actualidade, nove de cada dez procedementos concursais finalización coa liquidación.