Vieiros

As matemáticas deixaron pouco, ou ningún, lugar para as dúbidas. Dos 1.373 delegados que exerceron o seu dereito ao voto, 1.314 (95,7%) apoiaron a Anxo Quintana como candidato do Bloque á Xunta; 38 votaron en contra, 18 optaron polo sufraxio en branco e tres emitiron votos que resultaron nulos.

Logo de anunciarse pola megafonía o escrutinio, Anxo Quintana volveu dirixirse ao plenario. Reiterando as ideas básicas do seu primeiro discurso da xornada, Quintana felicitouse por unha asemblea protagonizada polo “sentidiño”. A diferenza que na primeira intervención, o líder do Bloque centrou boa parte do seu discurso na crise económica.

Segundo as súas palabras, o BNG é a única forza que demostra ter solucións propias nunha época de vacas fracas. Como exemplo detívose no reparto de concesións eólicas que se van facer este outono. Quintana sinalou que, a pesar de todas as críticas, “o que estamos a facer no sistema eólico é cambiar a historia. É a primeira vez que se lexisla a prol de todos os galegos e galegas”.

Quintana tamén insistiu na necesidade de “romper fronteiras” para acadar os votos dunha “maioría galeguista”. Con esta receita, volveu a apostar, o BNG pode conseguir o seu mellor resultado electoral da historia. Para logralo, tería que superar os 18 parlamentarios que obtivo o Bloque en 1997 (cinco máis que nos últimos comicios).

Anteriores:

• Quintana marca como obxectivo que "o BNG sexa o PG do século XXI"
• O plenario aproba o documento político con só dous votos en contra
  
• Jorquera sostén na apertura a Asemblea que o BNG soubo facer autocrítica