Vieiros

Polo momento sete persoas morreron no sur de Louisiana (EUA) logo do paso do furacán Gustav, que baixou á categoría dúas -un nivel considerabelmente inferior ao do Katrina de hai tres anos- unha vez impactou coa terra.

Segundo as autoridades estatais, catro dos falecidos eran enfermos en estado moi grave que morreron cando eran evacuados de hospitais en Nova Orleans, a capital do Estado. As outras tres persoas faleceron en dous accidentes provocados pola caída de árbores.

Ademais, máis de 800 mil persoas fican sen electricidade no sur de Louisiana. Mentres, o Gustav avanza en dirección ao sur de Texas, con tendencia a debilitarse cada vez máis e convertido xa en tormenta tropical, cunha intensidade menor da esperada logo de bater nas illas do Caribe.

Nos diques de Nova Orleans non se detectaron danos e o sistema de drenaxe parece funcionar, un dos problemas causantes da catástrofe de hai tres anos. No entanto, até pasadas unhas horas os expertos non poderán confirmar se os diques aguantarán a presión da auga.