Vieiros

Os estados do sueste de Estados Unidos Louisiana, Alabama e Florida prepáranse para a chegada do furacán Gustav este luns, que se achega con ventos de até 185 quilómetros por hora. Toda a zona está en estado de alerta e máis dun millón de persoas abandonaron xa os seus fogares, afastándose da costa.

Na memoria dos habitantes da rexión permanece fresca a lembranza do Katrina. Arredor de 1.500 persoas morreron e houbo perdas por valor de 80 mil millóns de dólares logo do paso daquel furacán hai tres anos.

Case un cento de mortos no Caribe
Esta fin de semana o Gustav afastábase das costas de Cuba logo de impactar en Isla de la Juventud, con ventos de até 340 quilómetros por hora, e atravesar a provincia de Pinar del Río. Non houbo vítimas mortais, tan só algúns feridos, aínda que os danos materiais foron cuantiosos.

O furacán pasou antes por Haití, República Dominicana e Xamaica, deixando 96 mortos, centos de feridos, case vinte mil damnificados e miles de vivendas e edificios destruídos.