Vieiros

O fillo do Che, Camilo Guevara; os cónsules xerais de Cuba en Galiza, Alejandro Fuentes, e de Venezuela, David Nieves; os escritores Anisia Miranda e Xosé Neira Vilas; o secretario xeral do Partido Comunista do Pobo Galego, Xosé Collazo Castro; mais, sobre todo, medio milleiro de persoas vidas de diferentes partes do mundo (Latinoamérica, Europa) estiveron presentes na inauguración da estatua homenaxe ao guerrilleiro cubano-arxentino en Bastiagueiro.

Había máis xente. Moitos medios de comunicación que, segundo o alcalde do Concello de Oleiros, Anxo García Seoane Gelo, deron unha visión pouco obxectiva do evento. E tamén "catro fascistas -non sete nin 48, catro- que traballan en barras americanas e que cobraron 20 euros por ir facer ruído", segundo lle relatou García Seoane a Vieiros.

Mais o importante, di Gelo, é que a obra -de perto de oito metros de altura e construída polos artistas cubanos Juan Quintanilla e Karoll William- "representa a solidariedade e o internacionalismo dunha persoa que morreu polas súas ideas, e coa que se identifica moita xente".

"Está claro que o PP ten votos porque hai quen lles vota, pero nós temos máis; ocorre que algúns non acaban de aceptar que nós temos máis", reflexiona o alcalde. "O que non entendo a postura que tivo o Bloque neste asunto -comenta a propósito deste tema-, aliñándose co PP".

"Moita demagoxia"
Cuestionado pola posibilidade que algúns comentan de facer unha homenaxe máis humilde, Gelo responde que "106 mil euros non é nada se o comparamos cos 57 millóns de pesetas (máis de 340 mil euros) que custou a estatua da heroína María Pita na Coruña, e ninguén dixo nada daquelas". Cita outros exemplos, tal como a efixie á Virxe do Carme, e xustifica o tamaño da do Che "porque se deseñou para unha rotonda; se encargamos un busto perderíase no espazo".

Ademais, respecto a este tema -do que afirma se fixo "moita demagoxia", Anxo García confesa que a obra se lle ofreceu a un artista galego do que, "por respecto", non quixo dar o nome, e que este lle pediu ao concello 80 millóns de pesetas polo proxecto. "Ao final -di- eliximos o que máis nos gustou dun concurso de ideas convocado polo goberno de Cuba".