Vieiros

Adolfo Gacio, actual rexedor de Boqueixón, parecía o chamado a calmar as augas revoltas do PP coruñés, despois dunha etapa de enfrontamentos co ex alcalde ferrolán, Juan Juncal, á fronte. Hai poucos meses, Gacio aparecía como o mellor colocado na carreira polo relevo á fronte do partido na provincia, toda vez que a insostíbel situación precipitada por Juncal levou á dirección do partido a asignarlle un posto na lista do Senado para acelerar a súa saída do primeiro plano.

Paradoxalmente, e sabedor deses movementos, o propio Juncal realizaba declaracións hai tempo facendo públicas as súas propias predileccións para o posto, e citando o nome do voceiro municipal na Coruña do PPdeG, Carlos Negreira. Este mesmo xoves volveuno postular para o cargo, cualificándoo como "o mellor candidato" para a sucesión. O propio Gacio admitía tamén que a aposta do partido por Negreira bloquea as súas propias posibilidades. "Son amigo de Carlos, sei da súa valía e non lle vou facer fronte", dixo Gacio. En declaracións para Europa Press, o rexedor de Boqueixón explicou que os actuais sectores críticos do PP coruñés "non teñen capacidade para organizarse" polo que será improbábel que apareza unha candidatura alternativa a Negreira no congreso provincial que o PPdeG organizará a finais de maio.

Por outro lado, hai coincidencia entre os rexedores populares sobre a satisfacción pola marcha de Juncal. "Non había alcalde en toda a provincia que o quixese", comentou ao respecto un alcalde do interior da provincia, laiándose da actitude mantida por Juncal durante o tempo que leva no posto.