Vieiros

Hai uns días que lles contabamos que despois da saída de Ramón Rodríguez Ares, promotor do experimento transfuguista de curto percorrido no poder, era probábel a readmisión dos membros do PSDP na disciplina do Partido Popular.

O propio ex alcalde sadense, Ramón Rodríguez Ares, confirmoulle este luns a Europa Press que tanto el coma outros tres edís do Partido Demócrata Sada Popular (PDSP) reingresarán no Partido Popular en apenas "uns días". Ares deu por "absolutamente pechado" o acordo de reintegración das catro actas de concelleiro nas filas populares, aínda que puntualizou que ten que falar con Hernández Cochón, presidente do PP en Sada, para acordar o día en que se fai público de forma formal.

O PDSP conta na actualidade con seis concelleiros en Sada, aínda que dous de eles, María del Mar Fernández e Marcos López, decidiron non solicitar, de momento, o reingreso no PP. Non obstante, a maioría dos afiliados da formación, uns 120, "están de acordo co cambio", segundo asegura Rodríguez Ares. Segundo Ares a integración no PP é necesaria porque "non é igual estar repartido que nunha soa lista". Nese sentido, lamentou non o facer antes das municipais xa que, nese caso, serían "a lista máis votada".

En Ponteareas, o regreso trae "escano" como premio
Máis longa era a traxectoria fóra do PP da Unión Condado Paradanta, liderada inicialmente por Xosé Castro e despois por súa filla, Nava Castro. Ao respecto, o PP de Pontevedra sorprendía este luns ao incluír a Nava Castro no terceiro posto da lista que presenta ao Congreso pola provincia, xusto por tras de Ana Pastor e Xavier Guerra. O propio presidente provincial do PP, Rafael Louzán, recoñeceu que ese agasallo forma parte do pacto para a integración "definitiva" da escindida UCPA no PP, nove anos despois da escisión en Ponteareas.

Por outro lado, no veciño Porriño, a formación Independentes de Porriño (IdeP), é tamén noticia despois de que o ex edil do PP, Gonzalo Ordóñez, recoñecese ser favorábel a unha reintegración do seu partido nas filas populares xa que "non ten sentido que haxa diferentes partidos e todos deben aglutinarse nunha única opción de centro dereita". Louzán tamén confirmou que o acordo está próximo. Non obstante, o voceiro de Independentes por Porriño recoñeceu que "será complicado" que o PP chegue a gobernar nesta localidade durante a presente lexislatura debido á negativa dos outros independentes, Cidadáns por Porriño (CxP), liderados por Nelson Santos, a sumárense a un posíbel pacto.