Vieiros

"Usan a Cámara como altofalante dos seus intereses", reprobou o voceiro parlamentario do PPdeG, Manuel Ruíz Rivas, asegurando que socialistas e nacionalistas non responden axeitadamente "cando se trata de controlar o seu labor". Así, Ruíz Rivas falou de "interpretación restritiva" do regulamento parlamentario, por exemplo á hora de definir os puntos que compoñen a orde do día de cada pleno. Como exemplo, sinalou que só un membro do Goberno compareceu a petición do PP, que formulou 50 solicitudes.

Doutra banda, quitoulle mérito ao balance de proxectos lexislativos tramitados no que vai de lexislatura. "Incumpren as súas promesas na tramitación de leis", teimou Rivas. Nese sentido, detallou que dos 35 proxectos aprobados, sete foron de creación de colexios profesionais, cinco de modificación doutras normas e tres de orzamentos. Así, o voceiro do PPdeG reduciu a só 20 os textos que foron iniciativa lexislativa de socialistas e nacionalistas.

Ao respecto, destacou que o seu grupo foi autor de dez proposicións de lei finalmente aprobadas, ás que sumou outras 15 que tamén votou a favor. "Por primeira vez a oposición ten a iniciativa" no impulso de normas, felicitouse.