Vieiros

Durante as primeiras horas despois da declaración do "estado de excepción" informouse en Paquistán da detención de arredor de medio milleiro de opositores. A cifra teríase dobrado nas horas posteriores, despois de que o presidente paquistaní argumentase que o país pasa por unha situación de "gravidade" polo incremento da "violencia extremista".

O primeiro ministro, Shaukat Aziz, afirmou para os medios que as eleccións lexislativas previstas para o próximo mes de xaneiro poderían adiarse até un ano e que o estado de emerxencia vaise prolongar "o tempo que faga falta".

Entre os detidos confirmouse que están o líder da Liga Musulmá en Paquistán, Iaved Hashmi, o responsábel da comisión independente dos Dereitos Humanos, Asma Jehagir, e varios integrantes de altos tribunais. O xornal local Dawn titulaba este domingo en portada "O segundo golpe de Musharraf", considerando que o xiro imposto polo xeneral aparca as esperanzas dunha transición democrática que agromaban nas últimas semanas despois da volta da ex primeira ministra Benazir Bhutto e a inminencia das eleccións lexislativas agora aprazadas.

Poden ampliar en Associated Press of Pakistan e The Nation.