Vieiros

No Consello da Xunta desta quinta feira o Goberno Galego acordou interpor un recurso no Tribunal Constitucional contra o decreto que regula as subvencións para programas de cooperación e voluntariado social, con cargo á asignación orzamentaria do IRPF.

A Xunta entraría daquela nun conflito positivo contra a orde española TAS/1051/2007 do 18 de abril, onde se establecen as bases da convocatoria destas subvencións, que o Goberno Galego quere controlar e xestionar por enteiro no seu territorio, xa que considera que as competencias en asuntos sociais son exclusivas de Galiza, e polo tanto, non lle corresponde ao goberno español regulalas no noso país.

Doutra parte, o goberno español insiste en que, segundo a interpretación do Tribunal Constitucional, existe un espazo para que eles poidan actuar nesta materia, a pesar de que Galiza ten asumidas as competencias en asistencia social desde o ano 1982. O Estado tamén lle respondeu á Xunta que entende que esta orde regula unha axuda de carácter supra comunitario e que, polo tanto, transcende o ámbito de actuación da propia comunidade.

Mais, despois destes tirapuxas, que veñen dende xuño, a Xunta resolveu acudir ao Constitucional cos seus requerimentos.