Vieiros

Para coñecer o xermolo que lle deu corpo aos movementos nacionalistas actuais en Galiza, e saber máis dos procesos históricos e políticos que abranguen grande parte do século XX, e estes primeiros tempos do XXI, e que moldearon e moldean o movemento nacionalista galego actual, dende Galiza Nova estruturaron estas xornadas, que tentan de dar cabida tanto ás análises de expertos e estudosos, coma ás experiencias dos protagonistas da historia do nacionalismo galego contemporáneo.

Neste sentido, veñen como convidados ás xornadas -que se desenvolven na Casa Galega da Cultura de Vigo, a sexta feira día 20, mais xa tiveron o seu comezo a semana pasada-, dúas persoas participantes dos movementos nacionalistas contemporáneos, Xosé Manuel Beiras Torrado e Encarna Otero Cepeda; e Manuel Anxo Fernández Baz, politicólogo.

Á volta das xornadas, tamén está aberta unha exposición, coa colaboración da Asociación Socio-Pedagóxica Galega, na mesma Casa Galega da Cultura, titulada O camiño do Autogoberno, que foi elaborada pola propia AS-PG e polo Instituto de Estudos Chairegos, e fai un percorrido polo camiño do autogoberno en Galiza.