Vieiros

Nas imaxes, o soldado británico Nathan Tohmas Sommers recoñece que entraron en augas da república islámica “sen permiso e fomos detidos polos gardacostas iranianos”, ademais di que “querería presentalle escusas ao pobo iraniano”.

Pola súa parte, o goberno británico cualificou de “escandalosa” e de “propaganda” a difusión deste vídeo xa que consideran que Irán está a “utilizar o noso persoal militar con fines propagandísticos”.

Mentres, o ministro de Exteriores de Irán, Manocher Mottaki, asegurou que Estados Unidos non se “atreverá” a atacar o seu país xa que “non está en condicións para implicarse nunha nova crise”.

Segundo recolle a axencia ISNA, Mottaki dubida dunha hipotética invasión por mor da crise interna que está a sufrir o país norteamericano. Nesta liña, subliña a lexitimidade de Irán para desenvolver a súa investigación nuclear civil, dentro do marco que estabelece o Tratado de Non Proliferación nuclear.

En referencia a crise dos soldados británicos detidos, explica que o Reino Unido “debe admitir o seu erro como primeiro paso para a súa liberación”.

Olmert cre que só conta cos EUA para facer fronte ao goberno de Teherán

Pola súa parte, o primeiro ministro israelí, Ehud Olmert, amosou este venres nunha entrevista en The Jerusalem Post o seu convencemento de que só conta cos Estados Unidos para frear a Irán. Segundo Olmert, “non teño a ninguén máis” e engade que por iso ten “unha enorme importancia” o “éxito” da súa misión en Iraq.

Na entrevista asegura que non lle vai dar consellos aos Estados Unidos “sobre a retirada das tropas de Iraq” porque, “quen vai estar alí para pelexar por Israel, para protexer os intereses de Israel ante Irán? Quen?”.

O xornal Haaretz tamén publica hoxe unha entrevista co primeiro ministro. Nun ton máis conciliador Olmert anuncia que “nos próximos cinco anos é posíbel chegar a un acordo de paz global cos Estados árabes e os palestinos”. Nesta liña, o mandatario israelí asegura que está “preparado para manter discusións e escoitar a Arabia Saudita sobre o seu enfoque e expoñerlles o noso”.