Vieiros

O convite insinuado hai días desde ERC sobre o posíbel apoio a un referendo sobre a autodeterminación no caso de que o Tribunal Constitucional obstaculice o desenvolvemento do novo Estatut, avanza esta semana no Parlamento de Cataluña.
 
O líder de CiU, Artur Mas, anunciou que trasladará á cámara esa proposta e a dirección de Esquerra acordou aceptar a proposta de negociación de CiU ao respecto. Na sesión do mércores, o líder de ERC e vicepresidente da Generalitat, Josep Lluís Carod-Rovira, subliñou que o seu partido "garante a estabilidade" do tripartito. Sobre o asunto, o presidente do goberno catalán, o socialista José Montilla, pediulles a ERC e CiU "lealdade", indicando que a iniciativa proxectada pode "debilitar" o goberno fronte á apertura de negociacións co Estado.
 
Segundo El Periódico de Cataluña, Carod tentou frear a iniciativa parlamentaria de ERC, onde topou coa oposición do secretario xeral da formación, Joan Puigcercós, e do seu estreito colaborador Xavier Vendrell, quen o domingo pasado comezara a polémica coas súas declaracións durante un acto público.
  Recomendámoslles o seguimento en Vilaweb.