Vieiros

O Consello de Seguridade das Nacións Unidas debe pronunciarse ao respecto do futuro de Cosova o próximo 3 de abril. Na mesa terán o informe presentado este luns por Martti Ahtisaari, o enviado especial da ONU na zona, onde se explica que a análise da historia recente, a realidade actual e o proceso negociador desenvolvido até agora, recomendan que Cosova gañe á fin a independencia.

"Cheguei á conclusión de que a única opción viábel é a independencia, que debe ser supervisada durante o treito inicial pola comunidade internacional", afirmou Athisaari. O documento presentado é a peneira de moitos meses de debates e xuntanzas con representantes de Cosova e de Serbia. Sobre o asunto, Rusia xa anunciou que vetará a proposta no Consello de Seguridade.