Vieiros

Organizadas por SETEM, UXT, COOO e CECU, entidades integradas na Campaña Mundial Play Fair 2008 (Xoga Limpo 2008), comezan unha serie de actividades de denuncia e sensibilización, encamiñadas a garantir o respecto dos dereitos fundamentais dos/as traballadores/as no sector de produción de artigos deportivos e, en particular, na fabricación de artigos con licenza para os vindeiros Xogos Olímpicos de Beixín. A campaña foi presentada este xoves en Galiza polo colectivo Amarante.

Calcúlase que os produtos "oficiais" das Olimpiadas han xerar ingresos por valor de 3 mil millóns de dólares. Porén, como amosaba o informe publicado a finais de 2007 pola campaña Roupa Limpa, denominado Os Xogos Olímpicos sen medallas en xogos sindicais, moitos destes artigos son fabricados en condicións de explotación, que implican graves violacións do dereito laboral internacional.

Pese a que estes abusos non se limitan só aos Xogos Olímpicos, os organizadores desta campaña pensan que as Olimpiadas son unha oportunidade para amosar a nivel mundial, que o Espírito Olímpico vai alén do deporte, e que os valores proclamados como tolerancia, solidariedade, respecto e xogo limpo, deben transcender a todos os niveis nun evento coma este.