Vieiros

Este domingo morreu en Pontevedra Faustino Santalices Muñiz, fillo de Faustino Santalices Pérez, etnomusicólogo que rescatou do esquecemento a zanfona e dignificou a construción da gaita galega. Santalices Muñiz caracterizouse sempre por unha inmensa devoción á figura do seu pai, do que foi depositario do seu arquivo e da súa memoria.

Santalices fillo loitou toda a súa vida polo recoñecemento do seu pai e pola perpetuación do seu labor a prol da tradición musical e cultural do país. No seu traballo como oftalmólogo en Madrid, especializouse no afiado do instrumental cirúrxico da súa especialidade, elevando a arte de afiar a categoría científica, algo que, como el sempre explicaba, só podía conseguir alguén nado en Ourense, terra de afiadores. Desenvolveu inventos e patentes que supuxeron un grande avance na cirurxía ocular do seu tempo.

Faustino Santalices Muñiz, doutor en medicina e cirurxía, oftalmólogo e afiador, terá un funeral na súa memoria na basílica de Santa María a Maior de Pontevedra, este martes ás 17 horas.