Vieiros

Esta fin de semana primaveral preséntase cunha explosión de concertos en diferentes locais do país. Ábrese o venres con case unha ducia de citas. Luar na Lubre fará un adianto exclusivo de temas do seu próximo disco na Coruña. A cita será ás nove da noite no Coliseum. Na mesma cidade, Le Club trae a La Taberna de Moe e a Boa Yunta.

En Compostela a cita é dobre: na sala Capitol actuará Reverend Horton Heat, mentres que na Krooner estarán Viernes 504, Pániko en las Calles e Dj Digro. En Vilagarcía de Arousa, á Samá Samá chegarán Jugoplastika, e en Tui estarán Monchos, no Chiringo Choróns.

A axenda de Vigo intégrana Amenaza de Muerte e Shodo, no Bar de Juan, mentres que na Clandestino de Nigrán actuarán Stereotipos. No Bar Liceum do Porriño estarán Maryland, e Jackelberrys no JJ Copas de Ponteareas. Josele Santiago e Pablo Novoa tocan este venres na pontevedresa Sala Karma.

Para o sábado, salientamos que Triángulo de Amor Bizarro estará ás 0:30 horas na Sala 600, de Melide. The Homens irán a Cangas, á Sala Son, a presentar o seu novo disco. Na mesma vila do Morrazo, na Sister Ray, actúan Arizona Baby. Skacha ambientará o Café Cultural Auriense, en Ourense, mentres que a cita en La Pecera de Vigo é con Coll & Costa.

A rapeira viguesa Aíd irá este sábado á Sala Karma de Pontevedra. En Lugo, dobre oferta: Stereotipos en Doble Moral e Aló Django na sala Clavicémbalo. Agoraphobia toca no Run Rum de Ferrol e Rey Mugre nas Pontes. En Compostela, na Capitol estarán Pülsar e Standstill.

Completan a axenda da fin de semana The Muggs, o domingo dende Detroit á Fábrica de Chocolate de Vigo, Josele Santiago e Pablo Novoa, na Sala Nasa de Compostela, e El Cubo e Pülsar, coa tradicional cita dominical da Sala Aturuxo de Bueu.