Vieiros

Por primeira vez, un tribunal estadounidense decidiu invalidar unha patente relacionada con xenes humanos. Concretamente, un tribunal federal de Nova York anulou as patentes que Myriad Genetics e a Universidade de Utah reclamaban sobre xenes relacionados co cancro hereditario de mama e de ovarios.

A sentenza responde unha denuncia dun grupo de pacientes e científicos representados pola Unión de Liberdades Civís dos EUA (ACLU) e pola Fundación a prol das Patentes Públicas (PUBPAT). Os dous colectivos consideran que a decisión xudicial é un triunfo e que pon en cuestión as patentes que pesan sobre dous mil xenes humanos.

"O xenoma humano, como a estrutura do sangue, da auga ou do aire, foi descuberto, non creado", aseguran. A sentenza afirma que as patentes recorridas son ilegais e restrinxen tanto a investigación científica como o acceso dos pacientes á atención médica. Ademais, considera que as patentes sobre xenes humanos son anticonstitucionais porque tratan sobre "produtos da natureza".

Calcúlase que aproximadamente o 20% de todos os xenes humanos están patentados nos EUA, entre eles os da enfermidade de Alzheimer, da distrofia muscular, do cancro de colon, da asma e doutras doenzas. Segundo un responsábel de PUBPAT, "as probas e os medicamentos son invencións e pódense patentar, pero os xenes non".

Myriad pretendía ter os dereitos exclusivos para practicar probas diagnósticas nos xenes do cancro de mama (BRCA1 e BRCA2) e evitar que calquera outro investigador puidese nin sequera mirar eses xenes sen o seu permiso. Ese monopolio faría imposíbel que as persoas afectadas puidesen acceder a probas alternativas ou a segundas opinións, ademais de permitirlle a Myriad cobrar o que quixese por esas análises.