Vieiros

O CB Breogán e a Fundación BALOGAL puxéronse a disposición do Comité Galiza de Unicef co fin de colaborar na recadación de fondos para enviar axuda a Haití, onde a poboación infantil se viu especialmente afectada polo sismo do pasado 12 de xaneiro.

Con motivo do partido da liga Adecco Ouro entre o Leite Río Breogán e o Tarragona 2017, este sábado ás 19.15 horas, voluntarios de Unicef recadarán no Pavillón dos Deportes de Lugo diñeiro para a emerxencia en Haití.

Desde o C.B. Breogán e Unicef Lugo fan un chamamento a todos os seus socios e simpatizantes para que colaboren. "Calquera achega, por pequena que sexa, é fundamental para salvar vidas e garantir o futuro dos nenos de Haití", sinalan.

Obradoiro
Tamén desde o Obradoiro de Compostela -que milita na ACB- anunciaron a súa colaboración cos damnificados polo sismo. Ademais dos 300 euros doados pola directiva, o 30% do que se recade por venda de entradas este sábado fronte ao Valladolid irá destinado a axuda humanitaria.