Vieiros

"Revélase como unha pantomima creada para dar unha aparencia de diálogo e participación cidadá nas cuestións da seguranza", reprochan desde o Movemento polos Dereitos Civís (MpDC) ao respecto do Consello Galego de Seguridade Cidadá. Recordando que non mantivo ningunha reunión desde hai máis de dous anos, láianse desde o colectivo de que a iniciativa quedase nun organismo actualmente "baleiro de contido".

As acusacións van contra a institución responsábel da convocatoria e coordinación deste Consello de Seguridade Cidadá, a delegación do goberno español, á que lle atribúen o desinterese en aproveitar este espazo de participación malia "a campaña mediática" que no seu momento acompañou a súa creación. Opinan desde o MpDC que o Consello, na medida en que servise de punto de encontro e representación dos actores sociais máis importantes do país, poderçia ser un espazo idóneo para encarreirar "programas e estratexias autonómicas en materia de seguridade". De xeito especial, censuran que nin sequera se facilitase a súa reunión con vistas ás alertas de seguridade despregadas con motivo do Ano Santo.